Lojtari i Domosdovës, Kristjan Lleshi është vënë në prangat e Policisë së Tepelenës, pasi gjatë ndeshjes së djeshme ka goditur me grusht gjyqtarin kryesor, Ardit Merdanaj.
Shkak për këtë u bë një penallti e akorduar për Tepelenën dhe kartoni i verdhë për lojtarin që shkaktoi atë. Një gjë e tillë solli pakënaqësi tek ekipi i Domosdovës, ndonëse këto dy skuadra nuk kanë më objektiva dhe vetëm luajnë për të respektuar kampionatin.
33-vjeçari Kristjan Lleshi, por që në futboll njihet me emrin Altin ka goditur me grusht në kokë Merdanajn, duke sjellë pasoja te ky i fundit.
Njoftimi i policisë
Arrestohet në flagrancë një lojtar i ekipit Domosdova për veprën penale “Goditje për shkak të detyrës”.
Nga specialistët Kundër Krimeve në Komisariatin e Policisë Tepelenë është bërë arrestimi në flagrancë i shtetasit:
Kristjan Lleshi, 33 vjeç, banues në Përrenjas.
Arrestimi i këtij shtetasi u bë pasi:
Gjatë ndeshjes së futbollit Tepelena – Domosdova, në Stadiumin “Sabaudin Shehu”, Tepelenë, ky lojtar i ekipit Domosdova ka goditur me grusht gjyqtarin kryesor të ndeshjes, shtetasin A.M.
Materialet i kaluan Prokurorisë së Rrethit Gjyqësor Gjirokastër për veprime të mëtejshme.
GSH.al